Misaka na sa 7.5 milyon ka tawo ang naapektuhan sa hiniusang epekto sa mga bagyong Luis, Maymay ug Neneng, lakip na ang habagat, sumala sa National Disaster Risk Reduction and Management Council o NDRRMC.
Base sa pinakabag-ong datos hangtod Agosto 23, mokabat kini sa 2.1 milyon ka pamilya gikan sa nagkadaiyang rehiyon sa nasud, lakip ang Metro Manila, Calabarzon, Mimaropa, Cordillera ug uban pang lugar.
Sa maong ihap, 9,872 ka pamilya o 34,103 ka indibidwal ang nagpabilin sa mga evacuation center.
Nagpabilin usab sa 29 ang namatay, samtang 19 ang nasamdan ug tulo ang gikatahong nawala tungod sa mga weather disturbance.
Aduna usab 89 ka lugar nga nagpabilin ubos sa state of calamity.
Sa kadaot sa mga kabtangan, 2,600 ka balay ang partially damaged samtang 269 ka balay ang hingpit nga naguba.
Mokabat sa P4.9 bilyon ang kadaot sa imprastraktura, samtang P1.7 bilyon ang kadaot sa agrikultura.
Samtang, mikabat na sa P1.24 bilyon ang kantidad sa ayuda nga gipanghatag sa gobyerno ngadto sa mga apektadong pamilya ug komunidad.
Padayon usab nga gimonitor sa NDRRMC ug mga lokal nga panggobyerno ang kahimtang sa mga lugar nga naapektuhan sa sunod-sunod nga kalamidad.
