Excited na ang Grammy-winning singer nga si John Legend nga makabalik ug makapahigayon og concert sa Pilipinas, nga matod pa niya mao ang pinuy-anan sa pipila sa labing mainiton nga music fans sa kalibotan.
Matud ni Legend, espesyal alang kaniya ang gugma ug suporta nga iyang madawat gikan sa mga Filipino matag higayon nga mobisita siya sa nasud.
Ikaupat na kini nga pagbisita ni John Legend sa Pilipinas ug dugay na niyang gihulat ang iyang pagbalik sa nasud.
Lakip sa pinakaminahal sa Filipino fans ang iyang kanta nga “All of Me,” nga nahimong paborito usab sa karaoke ug sa mga espesyal nga okasyon sama sa kasal ug anibersaryo.
Malipayon si Legend nga nahibalo nga ang iyang mga awit nahimong bahin sa kinabuhi sa daghang mga Filipino.
Sa iyang Manila concert nga “An Evening of Songs and Stories,” dili lamang musika ang iyang ipaambit, kundili apil usab ang mga istorya bahin sa iyang kinabuhi, mga inspirasyon ug mga awit nga iyang gisulat.
Gipaabot usab ni Legend ang usa ka dakong sing-along uban sa iyang Filipino fans, ilabina tungod kay ilado ang Pilipinas sa pagkahilig sa karaoke.
