Mokabat sa liboan ka mga residente sa Metro Manila ang napugos og bakwit gikan sa ilang mga panimalay padulong sa mga evacuation center tungod sa padayong pag-ulan nga dala sa Habagat.
Sa Quezon City, kapin 5,400 ka indibidwal ang temporaryong nagpabilin karon sa mga temporary shelter.
Bisan pa niini, adunay maayong balita alang sa mga commuter ug residente tungod kay hinay-hinay nang miubos ang baha sa pipila ka bahin sa Araneta Avenue sa maong siyudad.
Samtang, grabeng naapektuhan usab ang Pasig City, diin miabot na sa 1,970 ka pamilya o 7,061 ka indibidwal ang kasamtangang nagpabilin sa mga evacuation center samtang gihulat ang pagbalik sa maayo nga panahon.
Sa Maynila, kapin 500 ka indibidwal usab ang gipabakwit tungod sa paspas nga pagsaka sa lebel sa tubig-baha. Padayon gihapon nga problema alang sa mga biyahero ug motorista ang pipila ka dalan sa siyudad nga nalubog pa sa baha hangtod karon.
Padayon ang monitoring sa mga local government unit (LGU) ug disaster risk reduction and management offices sa kahimtang sa mga bakwit ug sa sitwasyon sa mga dalan sa tibuok Metro Manila.
