Gimandoan sa Palasyo sa Malacañang ang pagpatuman sa work-from-home arrangement alang sa mga buhatan sa gobyerno sa Metro Manila ug pipila ka probinsya sa Luzon karong Lunes, Agosto 10, tungod sa gipaabot nga kusog nga pag-ulan nga dala sa Southwest Monsoon o Habagat.
Subay sa Memorandum Circular No. 123, ipatuman ang alternative learning modules samtang suspendido ang face-to-face classes, gawas lamang kung modesisyon ang local chief executive nga kanselahon ang mga klase.
Lakip sa mga lugar nga sakop sa memorandum mao ang: Metro Manila, Abra, Bataan, Batangas, Benguet, Bulacan, Cavite, Ilocos Sur, La Union, Occidental Mindoro, Oriental Mindoro, Pampanga, Pangasinan, Rizal, Tarlac, Zambales.
Samtang, magpabiling abri ug operational ang mga ahensya nga naghatag og basic ug health services, disaster preparedness and response, ug uban pang importanteng serbisyo aron padayon nga matubag ang mga panginahanglan sa publiko atol sa dili maayong panahon.
Aduna usab og awtoridad ang mga local chief executive nga magpatuman og localized suspension sa klase ug trabaho sa mga buhatan sa gobyerno sa ubang lugar nga wala masakop sa memorandum.
Alang sa mga pribadong kompanya ug buhatan, anaa sa pagbuot sa management sa matag kompanya kung magsuspinde ba sila sa trabaho.
