Pito ang kumpirmadong namatay, lakip na ang suspek, samtang 15 ang nasamdan human sa pagpamusil nga gihimo sa usa ka tin-edyer nga estudyante sa usa ka eskwelahan sa gawas sa Bangkok, Thailand niadtong Agosto 7, 2026.
Nahitabo ang pagpamusil sa Debsirin Nonthaburi School sa Bang Kruai district, Nonthaburi province, diin usa ka 14-anyos nga estudyante ang giila nga suspek.
Matud sa otoridad, gigamit sa batan-on ang 9mm nga armas nga iya pa kuno sa iyang apohan. Sa wala pa moadto sa eskwelahan, giingong gipusil ug gipatay una sa suspek ang iyang lolo ug lola sa ilang balay.
Pag-abot sa eskwelahan, misulod ang suspek ug nagpabuto og kapin 26 ka bala, hinungdan sa kalisang ug kagubot samtang nangita og tagoanan ang mga estudyante ug mga magtutudlo sulod sa mga classroom.
Lakip sa pito ka namatay ang tulo ka magtutudlo, duha ka estudyante, ug ang lolo ug lola sa suspek. Human sa maong krimen, naghikog ang suspek pinaagi sa iyang gigamit nga armas.
Sa 15 ka nasamdan, adunay pipila nga naangol tungod sa kagubot ug pagsulay sa pag-ikyas sa lugar. Duha sa mga biktima ang gikatahong anaa sa kritikal nga kahimtang.
Samtang, gikumpirma sa Department of Foreign Affairs (DFA) nga walay Pilipino nga naapil o naapektuhan sa maong insidente.
Padayon pa ang imbestigasyon sa Royal Thai Police aron mahibal-an ang motibo luyo sa makalilisang nga pagpamusil.
