Gikumpirma ni Volodymyr Zelensky nga naigo sa opensiba sa militar sa Ukraine ang duha ka oil refinery sa Russia.
Sa iyang online nga pahayag, giingon ni Zelensky nga gipuntirya sa Defense Forces of Ukraine ang Slavneft-Yanos Refinery ug ang Bashneft-Novoil Refinery.
Dugang pa niya, naigo usab sa ilang pwersa ang duha ka military patrol boats ug mga sakayan nga kabahin sa gitawag nga “shadow fleet” sa Russia sa Black Sea.
Samtang, sumala sa gobernador sa Yaroslavl nga si Mikhail Evraev, napukan sa ilang depensa ang mga drone sa Ukraine nga misulay og pag-atake sa rehiyon. Apan ang nangatagak nga mga debris maoy hinungdan sa sunog sa tulo ka kabalayan.
Sa ulahi, gikumpirma sa gobernador nga upat ka tawo ang nasamdan tungod sa shrapnel, apan walay naitalang namatay sa insidente.
