Gikuwestyon ni kanhi House Speaker ug Leyte 1st District Representative Ferdinand Martin Romualdez ang pagka patas sa Office of the Ombudsman sa ilang ginahimong imbestigasyon batok kaniya, tungod kay giingong gigamit niini ang mga testigo nga kaniadto na gikuwestyon ang kredibilidad.
Giinsistir ni Romualdez nga ang iyang gipangayo lamang mao ang patas nga pagtratar ubos sa balaod. Matud niya, nagsalig ang Ombudsman sa mga testigo nga kaniadto giisip nga dili kasaligan sa maong opisina ug sa Department of Justice (DOJ).
Bisan wala maghatag ug ngalan ang kongresista, iyang gipasabot nga ang mga testigo adunay mga kaso nga cyberlibel ug perjury.
Lakip niini ang 18 ka kanhing bodyguard ni kanhi Ako Bicol Party-list Representative ug pugante nga si Zaldy Co.
Bisan pa niini, gipadayag ni Romualdez nga dili siya moatras sa maong pakigbisog ug magpadayon siya sa pag-atubang sa imbestigasyon.
Samtang, gipasalig ni Assistant Ombudsman Mico Clavano nga kasaligan ang ilang ipresentar nga mga testigo ug gisuportahan kini sa mga ebidensya ang ilang mga pahayag.
Bisan adunay isyu sa joint affidavit sa 18 ka kanhing bodyguard, matud ni Clavano nga klaro ug nagkasinabot ang ilang tagsa-tagsa ka affidavit, ilabi na may kalabotan sa giingong paghatod og kwarta nga nalambigit nila Zaldy Co ug Martin Romualdez.
