Nagpadayon ang hulga sa kusog nga ulan ug pagbaha sa habagatang bahin sa China human miigo ang Bagyong Noul sa lalawigan sa Guangdong niadtong Domingo.
Sumala sa mga taho sa lokal nga mga awtoridad, kapin sa 800,000 ka mga residente ang gipabakwit gikan sa ilang mga panimalay sa lalawigan, samtang kapin sa 350 ka mga biyahe sa eroplano ang gikansela sa Hong Kong, diin kapin sa 20 ka tawo usab ang nasamdan tungod sa kusog nga hangin ug ulan.
Mitugpa ang bagyo sa kabaybayonan sa Huidong County pasado alas-3:50 sa kaadlawon, nga nagdala og kusog nga hangin ug grabeng pag-ulan.
Nagpagawas ang China Meteorological Administration og red warning alang sa posibleng kalit nga pagbaha sa mga lalawigan sa Jiangxi, Hunan, Guangdong, Sichuan, Shaanxi, Gansu, ug sa habagatan-sidlakang bahin sa Xinjiang.
Bisan og mihuyang na si Noul ngadto sa lebel sa tropical storm samtang misulod sa kabaybayonan, nagpabilin gihapon nga taas ang risgo sa mga apektadong lalawigan.
Naghatag usab ang gobyerno sa China og 100 milyon ka yuan, nga bugti sa ₱820 milyon, alang sa relief ug rehabilitasyon sa Guangdong. Samtang, anam-anam nang mibalik sa normal ang operasyon sa Hong Kong International Airport human sa kapin 12 ka oras nga pagsuspinde sa mga biyahe.
Ang Bagyong Noul, nga nailhan kaniadto sa Pilipinas isip Bagyong Kiyapo, usa sa labing kusgan nga bagyong miigo sa China karong tuiga ug maoy hinungdan sa daghang pagpabakwit sa mga residente, pagkansela sa mga biyahe, ug dakong hulga sa pagbaha.
