Usa ka drone sa Russia ang gipukan sa usa ka Romanian fighter jet human kini giingong misulod sa Romanian airspace.
Kusganong gikondena sa nasud ang sunod-sunod nga mga paglapas sa airspace niini, nga kabahin usab sa teritoryo sa NATO ug European Union.
Sumala sa Romanian Defense Ministry, usa ka Romanian F-16 fighter jet ang naka-intercept sa usa ka drone sa Russia ibabaw sa Black Sea niadtong Domingo.
Kini ang ikatulong drone nga gipukan sa Romania sulod lang sa tulo ka adlaw, human sa daghang mga insidente sa pagsulod sa mga drone sa Russia sa airspace niini.
Ang Romania usa ka miyembro sa NATO ug nakigbahin sa utlanan sa Ukraine, nga padayon nga giatake sa Russia.
Si Romanian President Nicusor Dan miingon nga ang balik-balik nga paglapas sa airspace niini sa Russia dili madawat. Miingon siya nga ilang giseryoso ang mga insidente uban sa ilang mga kaalyado.
Ang NATO miingon nga giimbestigahan pa nila ang mga detalye sa pinakabag-o nga insidente.
Sumala sa mga awtoridad, ang drone luwas nga gipukan sa anaa sa 12 kilometros gikan sa lungsod sa baybayon sa Sulina, sa bahin sa ilang teritoryal nga katubigan.
Sukad sa pagsugod sa gubat tali sa Russia ug Ukraine, ang Romania nakatala na og 33 ka insidente sa pag-atake sa drone sa Russia sa airspace niini.
Samtang, wala pa’y gipagawas nga pahayag ang Moscow bahin sa insidente.
