Nakaalerto na ang Cybercrime Investigation and Coordinating Center (CICC) aron bantayan ang posibleng cyber threats, disinformation ug uban pang online nga kalihokan may kalabotan sa ika-limang State of the Nation Address (SONA) ni Pangulong Ferdinand “Bongbong” Marcos Jr. karong Hulyo 27.
Gisugo ni CICC Undersecretary Renato “Aboy” Paraiso ang ilang Cybercrime Response Center ug Threat Monitoring Center nga palig-onon ang monitoring sa nagkalain-laing online platforms pipila ka adlaw sa wala pa ang SONA sa Pangulo.
Matud ni Paraiso, nagsugod na ang ilang 24/7 Threat Monitoring aron masuta dayon ang bisan unsang hulga batok sa Presidente ug sa kaluwasan sa maong kalihukan.
Gibantayan usab sa ahensya ang mga panawagan sa pipila ka indibidwal nga mahimong hinungdan sa kagubot o pagdisturbo sa SONA nga himuon sa Lunes, Hulyo 27.
Apil usab sa ilang tutokan ang pagkatag sa maling impormasyon ug fake news nga posibleng makalibog sa publiko ug makapahinabo og panagbangi.
Bisan pa niini, giingon ni Paraiso nga wala pa sila nakarekord og seryosong hulga nga nagtumong sa pagdaot o pagsamok sa State of the Nation Address ni Pangulong Marcos Jr.
Apan kung adunay ilang mamonitor nga hulga, ipahibalo dayon kini sa mga law enforcement agencies aron matubag sumala sa balaod.
Gipasiugda ni Paraiso nga ang SONA usa ka importante nga bahin sa demokratikong proseso sa nasud, busa ang mga opinyon sa publiko kinahanglan nga ibase sa kamatuoran ug dili sa sayop nga impormasyon.
Gidasig usab niya ang publiko nga i-report pinaagi sa Hotline 1326 ang mga insidente sa disinformation, fake news, ug uban pang online nga kalihokan nga mahimong makaapekto sa SONA.
