Gihukman sa Sandiganbayan nga guilty si Janet Napoles sa 10 ka ihap sa graft ug 10 ka ihap sa malversation of public funds pinaagi sa falsification of documents.
Tungod niini, gisentensyahan si Napoles og 12 hangtod 15 ka tuig nga prisohan sa matag bilang sa graft, ug 17 ka tuig ug upat ka bulan hangtod 20 ka tuig nga prisohan sa matag bilang sa malversation.
Gihukman usab nga guilty ang kanhi Department of Agrarian Reform (DAR) Undersecretary Jerry Pacturan sa 10 ka bilang sa malversation, ug gisentensyahan og 14 hangtod 19 ka tuig nga prisohan sa matag kaso.
Samtang, gihukman usab nga guilty si Evelyn de Leon sa tulo ka bilang sa graft ug tulo ka bilang sa malversation. Gisentensyahan siya og 10 hangtod 12 ka tuig nga prisohan sa matag bilang sa graft, ug 14 hangtod 19 ka tuig nga prisohan sa matag bilang sa malversation.
Ang kaso may kalabutan sa giingong maanomalyang pagpagawas sa ₱50 milyon ngadto sa 10 ka non-government organizations (NGOs) pinaagi sa 10 ka local government units (LGUs) aron unta gamiton sa pagpalit og farm inputs ubos sa Department of Agrarian Reform.
Apan, sumala sa korte, napamatud-an nga ang 10 ka LGUs walay rekord sa maong mga proyekto ug wala usab sila mangayo sa maong pondo.
Gimando usab sa Sandiganbayan sila Napoles ug Pacturan nga ibalik ang ₱50 milyon, samtang ₱15 milyon ang gipabayad balik kang De Leon.
Gipasabot sa prosekusyon nga mahimo pa nga iapela sa mga akusado ang maong desisyon ngadto sa Korte Suprema.
