Gipadayag sa kampo ni kanhi House Speaker ug Leyte Rep. Ferdinand Martin Romualdez nga wala siyay plano nga mobiya sa nasod ug atubangon niya ang reklamong gisang-at batok kaniya sa Office of the Ombudsman sa higayon nga pormal na siyang mahatagan og kopya niini.
Sa pahayag sa iyang tigpamaba nga si Atty. Elaine Atienza, gilimod nila ang mga alegasyon nga naglikay si Romualdez sa proseso sa balaod.
Matud ni Atienza, nagpabilin si Romualdez sa Pilipinas ug tubagon niya ang reklamo sa higayon nga mahatod na kini kaniya.
“Rep. Romualdez has not yet been formally served with a copy of the complaint. Once we receive it, sasagot po kami nang buong-buo,” matud ni Atty. Atienza.
Gipasabot usab ni Atienza nga anaa pa lamang sa yugto sa preliminary investigation ang kaso ug wala pa kini maisampa isip kasong kriminal sa Sandiganbayan.
Dugang pa niya, nagpabilin nga naglungtad ang presumption of innocence o ang pagtan-aw nga inosente ang usa ka tawo hangtod mapamatud-an ang iyang sala. Kumpiyansa sila nga malimpyohan ni Romualdez ang iyang ngalan human masusi ang mga ebidensya.
“We deny in the strongest possible way any insinuation that Rep. Romualdez has attempted to evade the legal process. Uulitin po namin: kailanman ay hindi nagtago si Rep. Romualdez,” matud ni Atienza.
Dugang pa ni Atty. Atienza, “Hinarap nya ang ICI, at haharapin nya ang Office of the Ombudsman. Siya po ay nasa bansa at mananatili sa bansa until such time that he will be able to clear his name.”
