Magpalig-on sa ilang monitoring ang Bula Police Station human sa insidente diin usa ka fetus ang nakit-an nga gilabay sulod sa comfort room sa usa ka inn ning syudad.
Matud ni P/MAJ Junel Rey Gatera, hepe sa Bula Police Station, magpahigayon sila og paglibot sa mga motel ug hotel aron pahinumdoman ang mga tagdumala ug staff nga kinahanglan adunay proseso sa pagkuha og impormasyon gikan sa mga bisita, sama sa pagpakita og valid ID o bisan unsang dokumento nga makatabang sa pagberipika sa ilang pagkatao.
Sumala kang Gatera, lakip kini sa ilang mga lakang aron malikayan ang susamang insidente sa umaabot ug mas dali matumbok ang responsable kung adunay mga krimen o kalapasan nga mahitabo sulod sa maong mga establisemento.
Gipasabot usab sa hepe sa kapolisan nga naglisod pa ang Police Station 6 sa pag-ila sa suspetsadong inahan sa bata nga nalambigit sa insidente. Padayon pa ang ilang imbestigasyon ug pagkuha og dugang impormasyon aron masuta ang tinuod nga nahitabo.
Kahinumduman nga unang nakakita ang roomboy sa maong inn ug nakurat kini nga anaa na sa toilet bowl ang gibana-banaang pito ngadto sa walo ka bulan nga fetus.
