Misaka og kapin 9 percent ang presyo sa krudo sa world market niadtong Lunes ug nakaabot sa pinakataas nga lebel sulod sa usa ka bulan tungod sa kabalaka sa posibleng epekto sa US naval blockade batok sa Iran.
Sumala sa mga report, ipatuman pag-usab sa Estados Unidos ang naval blockade nga maglangkob sa tibuok baybayon sa Iran, apil ang mga pantalan, oil terminals, ug tanang barko bisan unsa pa ang ilang bandila o nasud nga gigikanan.
Ang maong lakang nagpukaw pag-usab sa kahadlok bahin sa pagpadala sa enerhiya pinaagi sa Strait of Hormuz, usa sa pinakaimportanteng agianan sa suplay sa lana sa kalibutan.
Misaka ang Brent crude futures og 7.29 ka dolyar o 9.59 percent aron mosaka sa 83.30 ka dolyar matag barrel. Samtang ang US West Texas Intermediate o WTI crude misaka og 6.73 ka dolyar o 9.42 percent, nga miabot sa 78.14 ka dolyar matag barrel.
Ang Brent crude nakarekord sa pinakadakong usa ka adlaw nga pagsaka sa kantidad sukad Abril 2, samtang ang US crude futures nakasinati usab sa pinakadakong adlaw-adlaw nga pagtaas sukad Abril 29.
Gikatakdang ibalik sa US Navy-led Joint Maritime Information Center ang blockade karong Hulyo 14 sa alas-8 sa gabii, human kini temporaryong gitangtang niadtong tunga-tunga sa Hunyo.
