Gipadayag ni US President Donald Trump nga gusto sa Estados Unidos nga kontrolon ang Strait of Hormuz, diin moagi ang kapin 20 percent sa suplay sa lana sa tibuok kalibotan.
Sa iyang interbyu niadtong Lunes (oras sa Amerika), miingon si Trump nga posible nga ang US maoy modumala sa maong agianan ug molihok isip tigpanalipod niini.
Dugang pa niya, mahimong “guardian angel” ang Estados Unidos sa Strait of Hormuz. Matud ni Trump, gusto usab sa iyang administrasyon nga bayran sila sa ubang mga nasod alang sa gasto sa Estados Unidos sa pagbantay ug pagseguro sa Strait of Hormuz.
Sunod niini, gipahibalo sa pangulo nga ibalik sa US ang naval blockade batok sa Iran ug magpatuman og 20 percent toll fee sa mga kargamento nga moagi sa Strait of Hormuz aron matabonan ang gasto sa pagmintinar sa seguridad sa rehiyon.
Gihimo ni Trump ang maong pahayag human misaka pag-usab ang tensyon tali sa Estados Unidos ug Iran, human sa bag-ong pagbinayloay og air strikes niadtong Domingo.
Tungod niini, misaka og kapin 3 percent ang presyo sa Brent crude, nga miabot sa kapin $80 kada bariles gikan sa $71.99 sa miaging semana.
Bisan pa niini, ubos pa gihapon kini kumpara sa labing taas nga presyo nga natala niadtong Abril nga miabot sa $126 kada baril. Naapektuhan usab ang pipila ka stock markets sa Europa ug Asya, samtang mihinay gamay ang US stock futures tungod sa nagpadayon nga panagbangi sa rehiyon.
