Miabot na sa 17 ka tawo ang namatay samtang kapin sa tunga sa milyon ka indibidwal ang naapektuhan sa Bagyong Inday, sumala sa report sa National Disaster Risk Reduction and Management Council.
Ang mga namatay gilangkuban sa mga biktima sa pagkalumos ug landslide tungod sa epekto sa bagyo.
Napulo sa mga namatay gikan sa Malapatan, Sarangani, samtang lima ang gikan sa Calanogas, Lanao del Sur, ug duha naman gikan sa Bukidnon.
Aduna usab siyam ka tawo nga nagpabiling missing, diin unom niini gikan sa Calanogas ug tulo gikan sa Malapatan.
Gibanabana nga 112,500 ka pamilya ang naapektuhan sa maong kalamidad.
Nakapaabot na ang gobyerno og P16.41 milyon nga kantidad sa tabang ngadto sa mga residenteng naapektuhan sa bagyo.
Kahinumdoman nga migawas na sa Philippine Area of Responsibility (PAR) ang Bagyong Inday niadtong Sabado.
