Giinsistir sa prosecution sa ikaduhang adlaw sa impeachment trial batok kang Vice President Sara Duterte nga ang mga pahayag niini nga adunay giingong hulga batok kang Pangulong Ferdinand Marcos Jr., First Lady Liza Araneta-Marcos, ug kanhi House Speaker ug Leyte First District Representative Martin Romualdez klaro matod pa nga paglapas sa pagsalig sa publiko.
Atol sa pagdungog kagahapon Martes, Hulyo 7, gipresentar sa prosecution ang mga kopya sa giingong mga pahayag ni Vice President Duterte niadtong Nobyembre 23, 2024, lakip ang uban pang misunod nga mga pahayag.
Gikwestyon ni Senator-Judge Risa Hontiveros nganong giisip nga lig-on nga basihan sa impeachment ang maong mga pahayag.
Matod ni private prosecutor Atty. Amando Ligutan, ang mga pahayag nagpakita matod nga adunay plano o sistema ang giingong mga hulga, lakip ang giingong pagkontrata og usa ka mamumuno.
Giingon usab ni Ligutan nga dili normal ang pagpanghulga sa kinabuhi sa usa ka naglingkod nga Presidente ug kini ang unang higayon nga nahitabo ang ingon niini sa kasaysayan sa nasud.
Gipasiugda pa sa prosecution nga ang maong mga giingong binuhatan “110 percent” nga paglapas sa pagsalig nga gihatag sa publiko ngadto sa Bise Presidente.
Human sa tubag sa prosecution, wala na usab mangutana si Senator-Judge Hontiveros.
