Pormal nang gitapos sa Iglesia ni Cristo ang ilang tulo ka adlaw nga rally, sumala sa gipahibalo sa ilang tigpamaba nga si Edwil Zabala kagahapon, Huwebes, Hulyo 2.
Sa usa ka video message, nagpasalamat si Zabala sa tanang mitambong sa tulo ka adlaw nga panagtigom, ingon man sa mga personalidad nga mipadayag og suporta ug sa mga kapulisan nga naghatag og seguridad atol sa maong kalihokan.
Matud pa niya, nagtuo sila nga klaro nilang napaabot ang ilang mensahe ngadto sa mga hingtungdan nga opisyal. Naglaom usab siya nga ang hustisya ang mopatigbabaw sa nasud ug dili ang mga tawo nga nagabaluktot sa balaod alang sa kaugalingong interes.
Gidugang ni Zabala nga dinhi na nagtapos ang ilang malinawon nga rally ug naglaom siya nga ang tanang mitambong makauli nga luwas ug malinawon sama sa ilang pag-abot.
Ang unang duha ka adlaw sa protesta gihimo sa People Power Monument daplin sa Epifanio de los Santos Avenue sa Quezon City. Apan sa ikatulo ug katapusang adlaw, gibalhin ang panagtigom sa Liwasang Bonifacio sa Manila human bawi-on sa lokal nga gobyerno sa Quezon City ang permit alang sa rally sa People Power Monument.
Kahinumdoman nga kalit nga nagpahigayon og rally ang INC niadtong Martes isip pagpadayag og suporta kang Sen. Rodante Marcoleta, nga nag-atubang sa posibleng kasong plunder nga giandam sa Office of the Ombudsman.
Gikondena sa relihiyosong grupo ang ilang gitawag nga “selective justice” ug “distortion of law” may kalabotan sa kaso ni Marcoleta, nga giakusahan sa wala pagdeklara sa P75 milyong campaign contributions nga nadawat gikan sa tulo ka donor, lakip ang kanhi kongresista nga si Mike Defensor.
Samtang, sumala kang Philipp Ines, miabot sa 82,000 ang kinatas-ang ihap sa mga raliyista nga mitambong sa ikatulo ug katapusang adlaw sa rally sa Liwasang Bonifacio base sa tala alas-8:00 sa gabii. Matud pa niya, sa kinatibuk-an malinawon ang pagtapos sa rally sa INC.
