Nisaka na ngadto sa 88 ang ihap sa mga namatay sa magnitude 7.8 nga linog nga miigo sa Maasim, Sarangani ug mga silingang probinsya niadtong Hunyo 8, sumala sa National Disaster Risk Reduction and Management Council (NDRRMC).
Sa pinakabag-o nga situational report nga gipagawas niadtong Miyerkules, ang NDRRMC miingon nga kini pito ka dugang kaysa sa 81 ka namatay nga natala niadtong Hunyo 26.
Sa kinatibuk-an, siyam lang ka namatay ang gikumpirmar tungod sa linog ug silang tanan gikan sa Region 11 (Davao Region). Samtang, 79 pa ka namatay ang gisusi pa, lakip ang 12 gikan sa Region 11 ug 67 gikan sa Region 12 (Soccsksargen).
Ang ihap sa mga nasamdan nagpabilin nga 1,316, samtang 24 ka tawo ang wala pa mailhi.
Moabot sa 391,275 ka pamilya o katumbas sa 1,679,152 ka mga indibidwal gikan sa 627 ka mga barangay sa Rehiyon 9 (Zamboanga Peninsula), 11, 12 ug sa Bangsamoro Autonomous Region in Muslim Mindanao (BARMM) ang naapektuhan sa linog.
Gi-report usab sa NDRRMC nga moabot sa 113,279 ka mga balay ang nadaot, diin 94,919 ang partially damaged ug 18,360 ang hingpit nga naguba. Giklaro sa ahensya nga ang tanang datos gi-beripikar pa ug mahimong mausab.
