Kon adunay usa nga maisip nga “pinakadugo” sa upat ka Articles of Impeachment batok kang Bise Presidente Sara Duterte, kini mao ang sayop nga paggamit ug pag-abuso sa confidential funds tungod kay 31 ka trial dates ang gigahin alang niini nga kaso.
Base sa 15 ka panid nga Pre-Trial Order nga gi-isyu sa impeachment court kagahapong adlawa, Hunyo 30, ang Article I nga may kalabotan sa giingong pagpangawat ni Duterte og P612.5 milyon mao ang pinakataas sa tanan kon itandi sa laing tulo ka artikulo.
Nahibal-an nga 11 lang ka trial dates ang gigahin alang sa Article IV o Assassination Plot, Grave Threats ug Inciting Sedition Against the Government nga unang ipasaka sa Impeachment trial nga magsugod sa Hulyo 6, 2026.
Ang Impeachment Court nagbutang og 12 ka trial dates alang sa Article II o Unexplained Wealth, False SALNs (Statement of Assets, Liabilities and Networths) ug Continued Business Interest.
Ang pinakamubo mao ang Artikulo III o Bribery and Corruption sulod sa Department of Education tungod kay ang Impeachment Court naggahin lang og 8 ka petsa sa husay alang niini.
Sumala sa pagpasabot ni Prosecutor ug Manila Rep. Joel Chua, daghang mga dokumento ug mga saksi ang kinahanglan ipresentar sa artikulo sa confidential funds busa magkinahanglan kini og mas taas nga mga petsa sa husay.
Sa kinatibuk-an, ang Impeachment court nagtakda og 62 ka petsa sa husay apan sumala ni Chua, posible nga ang husay dili makaabot niini nga lebel kung hangtod sa duha ngadto sa tulo ka mga saksi ang ibutang sa witness stand kada adlaw.
