Gisuportahan sa Department of the Interior and Local Government (DILG) ang panawagan nga ipaubos ang edad sa kriminal nga pananagutan sa nasud.
Matud ni DILG Secretary Jonvic Remulla, usa sa nakita nilang kakulangan sa Juvenile Justice Law mao ang paggamit sa pipila ka menor de edad isip drug courier aron malikayan ang mas bug-at nga kaso kung madakpan.
Bisan pa niini, wala pa matino ang eksaktong edad nga ilang isugyot, apan nakig-alayon ang DILG sa Kongreso aron hisgutan ang maong isyu.
Ubos sa Republic Act No. 9344 o Juvenile Justice and Welfare Act, ang mga bata nga edad 15 paubos exempted sa criminal liability ug ilalom lamang sa intervention programs.
Nisamot pag-init ang diskusyon bahin niini human sa makalilisang nga mass shooting sa usa ka eskwelahan sa Tacloban City nga giapil sa duha ka menor de edad nga suspek, diin tulo ka estudyante ang namatay ug 20 pa ang nasamdan.
