Gitubag ni Sen.Panfilo Lacson ang banat ni Sen. Alan Peter Cayetano nga nagtawag kaniya og “aso” sa Malacañang.
Sa iyang pahayag sa X o kanhing Twitter, klarong giingon ni Lacson nga dili gayod niya dawaton ang maong akusasyon.
Matud pa niya, dugay na siyang gitawag ni Cayetano og “Kuya Ping,” busa kung tinuod man nga “aso” ang pagtan-aw kaniya niini, murag usa usab kini ka pag-angkon ni Cayetano sa iyang kaugalingon.
Dugang pa ni Lacson, naluoy siya sa kahimtang ni Cayetano tungod kay kung unsa-unsa na lamang matod pa ang gipangsulti niini.
Mipahayag usab siya og kabalaka ug naglaom nga dili unta moabot sa punto nga mag-meltdown o dili na makakontrol sa kaugalingon ang iyang kaubang senador.
Gihimo ni Lacson ang maong pahayag human sa Facebook Live broadcast ni Cayetano diin gitawag niya kini og “aso.”
Gipasabot ni Cayetano nga ang iyang paggamit sa pulong nga “aso” nagtumong sa usa ka tawo nga sunod-sunoran lamang sa mga sugo.
Gawas kang Lacson, gitawag usab ni Cayetano si Sen.Vicente Sotto III ug si Sen.Raffy Tulfo nga mga “tuta” sa Malacañang, samtang giakusahan usab niya si Sen. Erwin Tulfo nga “tuta” matod pa ni Lacson tungod kay adunay impluwensya o kontrol kini kaniya.
