Wala pa hingpit nga nabalik ang normal nga koneksyon sa kuryente sa liboan ka kabalayan sa Mindanao human sa magnitude 7.8 nga linog, subay sa datos sa National Electrification Administration.
Sumala sa report nga gipagawas sa ahensya kagahapong adlawa, Hunyo 9, nagpadayon pa gihapon ang restoration efforts aron mabalik sa normal ang suplay sa kuryente sa kinatibuk-ang 157,263 ka consumer connections.
Kini nga mga konsumidor naapektuhan sa pagkawala sa kuryente human sa kusog nga linog.
Bisan pa niini, nabalik na usab ang suplay sa kuryente sa 34 sa 35 ka apektadong mga munisipalidad.
Ang mga apektadong lugar gikan sa Davao Region ug SOCCSKSARGEN Region nga maoy duha sa labing grabeng naapektuhan sa linog. Sa kasamtangan, tulo ka electric cooperative ang nakasinati gihapon og partial power interruption.
Wala pa usab datos sa pagkakaron kung pila ang kantidad sa kadaot nga nahibilin sa linog sa power sector samtang nagpadayon pa ang assessment sa mga pasilidad.
