Mipahibalo ang Partido Demokratiko Pilipino nga plano nila nga moduol sa Korte Suprema aron magpasaka og petisyon may kalabotan sa nahitabo nga botohan nga miusab sa liderato sa Senado.
Sa opisyal nga pamahayag sa partido pinaagi ni National Deputy Spokesperson Atty. Ferdinand Topacio, iyang giingon nga ipadayag nila ang ilang plano sa pagpasaka og kaso sa Korte Suprema.
Bisan pa og wala pa’y eksaktong petsa, giingon niya nga paningkamotan sa grupo nga makasang-at og petisyon sa Kataas-taasang Hukuman sa labing dali nga panahon.
Tumong sa ilang aksyon mao ang pagpalig-on ug pagpanalipod sa Saligang Batas batok sa mga senador nga miapil sa maong botohan niadtong miaging adlaw.
Matud pa sa partido, nagtuo sila nga dili husto ang rason nga igo na ang 12 ka senador aron makahimo og botohan ug makausab sa liderato sa Senado.
Giinsistir nila nga sumala sa balaod, kinahanglan og 13 ka senador aron legal nga makahimo og pagbotar ug pag-ilis sa liderato sa Senado.
Gipasiugda usab sa PDP nga bisan pa og adunay mga absent, masakiton, nakakulong, o naa sa gawas sa nasod ang uban nga senador, kinahanglan gihapon ang 13 ka boto aron mahimong balido ang maong proseso.
