Gibarugan ni Senador Robin Padilla ang pagdepensa kang Senador Ronald “Bato” dela Rosa taliwala sa isyu sa posibleng pagdakop niini may kalabotan sa warrant gikan sa International Criminal Court, ug giingon nga kinahanglan tugotan gihapon kini sa pagtuman sa iyang katungdanan isip senador pinaagi sa online o remote attendance.
Sa iyang post sa social media, giingon ni Padilla nga hangtod walay pinal nga desisyon sa korte, dili angay tan-awon nga kriminal ang usa ka napiling opisyal ug kinahanglan hatagan kini og higayon nga makaserbisyo gihapon sa katawhan.
Gipasiugda usab niya ang prinsipyo sa “presumption of innocence” o nga inosente ang usa ka tawo hangtod mapamatud-ang sad-an.
Matud pa niya, adunay mandato gikan sa katawhan si dela Rosa human makakuha og daghang boto sa 2025 senatorial elections, busa dapat tugotan gihapon kini sa pag-apil sa sesyon bisan pinaagi sa teknolohiya.
Si dela Rosa nagpabilin ubos sa hulga sa pagdakop human mai-report nga target siya sa ICC warrant. Nahinumdoman nga niadtong Mayo 11 mitunga siya sa Senado sa makadiyot sa wala pa nausab mawala sa publiko, ug sa ulahi migawas sa Senado uban ni Padilla human sa shooting incident sulod sa Senado.
