Gihangyo sa Office of the Ombudsman ang Sandiganbayan nga magpagawas og precautionary hold departure order batok nila Sen. Rodante Marcoleta, kanhi Anakalusugan party-list Rep. Mike Defensor, ug duha ka negosyante kalabot sa giingong P75 milyon nga campaign donation alang sa kandidatura ni Marcoleta sa 2025 elections.
Base sa rekomendasyon sa mga field investigator sa Ombudsman, kinahanglan matod pa nga kasuhan og plunder ug indirect bribery sila Marcoleta, Defensor, negosyanteng si Joseph Varias Espiritu, ug Aristotle Baluyut Viray.
Matod sa mga imbestigador, gidawat matop pa ni Marcoleta ang kinatibuk-ang P75 milyon nga campaign donations sa tulo ka nagkalainlaing adlaw, nga gikonsiderar nga “gift” nga posibleng mosulod sa kasong plunder ubos sa anti-graft laws.
Nasayran nga nasumite na sa Seventh Division sa Sandiganbayan ang hangyo sa Ombudsman niadtong Lunes, Mayo 25.
Bisan pa niini, wala pa’y gipagawas nga pinal nga resolusyon ang Office of the Ombudsman aron aprobahan ang pormal nga pagsaka sa mga kaso batok sa mga respondent.
Samtang, gihimakak ni Marcoleta ang mga alegasyon sa iyang privilege speech niadtong Lunes. Matod sa senador, politically motivated ang mga reklamong gisang-at batok kaniya ug daw adunay paningkamot nga baliktaron ang balaod.
Wala pa usab opisyal nga pahayag sila Defensor, Espiritu, ug Viray kalabot sa maong isyu.
