Hugot nga gihimakak ni Sen. Francis Pangilinan ang mga espekulasyon nga nagdugtong kaniya sa giingong bag-ong kudeta sa liderato sa Senado, ug iyang gipaklaro nga wala siya’y interes nga mahimong Senate President.
Sa iyang Facebook post, miingon ang senador nga mas gusto niyang ipunting ang iyang panahon sa isyu sa food security kaysa moapil sa panagbangi sa liderato sa Senado.
“Hindi po tayo interesado sa pagiging Senate president. Tutulong na lang ako sa kanila. Para sa akin, mas importante ang food security kaysa sa Senate presidency,” matod pa ni Pangilinan.
Mitumaw ang maong pahayag human sa mga report nga adunay pipila ka senador nga naglihok aron ilisan pag-usab si Senate President Alan Peter Cayetano pipila ka adlaw human siya milingkod isip Senate president kapuli ni Vicente Sotto III.
Sumala sa mga taho, adunay pipila ka senador nga dili kumbinsido sa estilo sa pagpangulo ni Cayetano ug nagduhaduha kung makahimo ba siya sa paghiusa sa Senado sa nahibiling termino sa administrasyon ni Pangulong Ferdinand Marcos Jr..
Gikuha na kaniadto si Pangilinan isip chairperson sa Senate committee on agriculture, food and agrarian reform human sa kausaban sa liderato sa Senado, samtang si Cayetano nakakuha sa minimum nga 13 ka boto aron mahimong Senate president uban sa suporta ni Senator Ronald dela Rosa.
