Misaka sa 7.2% ang year-on-year headline inflation sa bulan sa Abril gikan sa 4.1% sa Marso, mahitungod sa pagsaka sa international fuel prices nga nakaapekto sa gasto sa pagkaon ug enerhiya.
Nisobra kini sa forecast range sa Bangko Sentral ng Pilipinas nga 5.6% hangtod 6.4% alang sa maong bulan.
Gikan Enero hangtod Abril, niabot sa average nga 3.9% ang inflation, mas taas kaysa target nga 3.0% sa tibuok tuig.
Sa mga kabalayan nga sakop sa lowest 30 percent sa populasyon, mas kusog ang pagsaka sa inflation gikan sa 4.2% sa Marso ngadto sa 8.5% sa Abril.
Nagpadayon usab ang pagsaka sa presyo sa bugas ug isda tungod sa mas mahal nga post-harvest ug transportasyon, samtang misaka ang transport ug kuryente tungod sa pagtaas sa presyo sa petrolyo ug generation charges.
Sa laing bahin, misaka usab ang core inflation gikan 3.2% ngadto sa 3.9%, ug nagpabilin nga alerto ang BSP sa mga epekto niini samtang andam mohimo og lakang aron mabalik sa target nga 3% ang inflation.
