Naglaum si Senator Risa Hontiveros nga ibutyag ni kanhi Ako Bicol Representative Zaldy Co ang iyang nahibaluan may kalabotan sa dakong eskandalo sa flood control projects sa gobyerno sa iyang pagbalik sa Pilipinas.
Sa eksklusibong pakighinabi sa Bombo Radyo Philippines kang Hontiveros, gitawag niya nga usa ka dako nga pyesa ang mahimong kooperasyon sa kanhi kongresista, nga giingong adunay dakong partisipasyon sa nabutyag nga korapsyon, sa ginahimong serye sa mga ebidensya sa Senate Blue Ribbon Committee. Dako usab kini og matabang, matod pa niya, sa pinal nga report sa nagpadayon nga pagdungog ug imbestigasyon sa komite.
Kabahin niini, kumpiyansa si Hontiveros nga madugangan pa ang mga pirma sa partial committee report sa Blue Ribbon Committee nga gipangulohan ni Senator Panfilo Lacson.
Naglaum si Hontiveros nga ang pagkadakop kang Co makatabang sa pagdani sa ilang mga kauban nga senador nga mopirma na sa paunang report sa komite aron mapresentar kini sa plenaryo sa Senado ubos ni Lacson ug maipahibalo sa publiko ang mga nakit-an sa pagdungog bahin sa giingong mga anomalya sa flood control projects sa gobyerno.
Sa pagkakaron, adunay unom ka pirma ang maong partial report ug nagkinahanglan pa og tulo ka dugang nga pirma aron matungtong kini sa plenaryo sa Senado, diin pagadebatehan, usbon kung kinahanglan, ug aprobahan sa mga senador aron makatabang sa mas lawom nga imbestigasyon sa Senado ug sa mga ahensya sa gobyerno.
Apan, mahinumduman nga miingon si Lacson nga iyang i-postponed sa pagkakaron ang pagdungog sa Blue Ribbon Committee hangtod dili pa kompleto ang mga pirma sa paunang report sa komite.
Una nang giingon ni Imee Marcos, nga nailhan nga kritiko ni Lacson sa iyang pagpanguna sa Blue Ribbon Committee, nga dili sila mopirma ni Sen. Rodante Marcoleta sa maong partial report tungod kay kulang matod pa ang ginahimong imbestigasyon sa komite.
Sa karon, plano ni Lacson nga maghimo og chairman’s progress report ug isumite kini sa Office of the Ombudsman ug sa Department of Justice nga adunay uban nga mga ebidensya nga nadiskubre sa mga pagdungog sa komite aron makatabang sa imbestigasyon sa maong mga ahensya. Usa usab kini ka paagi, matod niya, aron ma-abriham pag-usab ang pagdungog sa Blue Ribbon Committee ug mapadayag sa publiko ang sulod sa report.
Samtang, plano usab ni Lacson nga imbitahon si kanhi House Speaker Martin Romualdez sa oras nga magpadayon ang pagdungog sa Blue Ribbon Committee aron pag-atubangon sila ni Co ug 18 ka kanhi sundalo nga giingong naghatod og maleta nga puno sa kuwarta ngadto sa pipila ka personalidad, aron matino sa pagdungog kung kinsa ang nagsulti og tinuod.
