Gimando ni Presidente Ferdinand Marcos Jr. ang pag-usab sa mga pagpangandam sa Pilipinas alang sa ASEAN 2026 aron makadaginot og kwarta ug maka-focus sa mga importanteng isyu.
Sumala sa Presidente, isip kabahin niini, gibana-bana nga 650 ka mga miting sa pagpangandam, lakip ang working group, mga senior official, ug mga miting sa lebel sa ministerial, ang ibalhin online.
Gikumpirma ni Pang. Marcos nga ang Leaders’ Summit sa Mayo himuong “bare bones” o simple, nga naka-focus sa mga dinalian nga isyu sama sa seguridad sa enerhiya, pagkaon, ug kaayohan sa mga migranteng trabahante.
Ang gobyerno nagpagawas na og memorandum aron ipatuman kini nga mga pagbag-o, lakip ang pagpahigayon og mga diplomatic briefing sa Department of Foreign Affairs.
Sumala ni ES Ralph Recto, ang tumong niini nga lakang mao ang pagpalig-on sa panaghiusa sa ASEAN ug pagpalambo og mga konkreto nga tubag sa mga hagit sa kalibutan, labi na taliwala sa krisis sa Middle East.
Ang gobyerno gilauman usab nga makadaginot og kwarta ug maggahin og pondo sa mga programa nga makatabang sa mga lungsuranon nga naapektuhan sa krisis sa lana sa kalibutan.
Gipasiugda sa gobyerno nga ang dali nga aksyon ug praktikal nga mga solusyon mas importante karon kaysa mga dagkong seremonya.
