Usa ka barko nga nagdala og sobra sa 700,000 ka bariles sa krudo gikan sa Russia ang miabot sa Pilipinas, pipila ka adlaw human gideklara sa nasud ang usa ka national energy emergency tungod sa gubat sa Middle East.
Ang Sara Sky nga adunay bandila sa Sierra Leone nagdala og taas nga kalidad nga lana gikan sa pipeline sa ESPO sa Russia ug miabot niadtong Lunes.
Sumala sa mga dokumento, ang nakadawat sa kargamento mao ang Petron Corp, ang operator sa bugtong oil refinery sa Pilipinas.
Ang Pilipinas nagsalig pag-ayo sa imported nga lana, nga nahimong mas mahal human ang gubat sa US-Israel sa Iran nga partially nagsira sa Strait of Hormuz.
Usa ka tigbalita sa AFP nakakita sa Sara Sky nga nakaangkla sa pantalan sa Limay duol sa Manila, diin nahimutang ang refinery sa Petron. Gituohan nga kini ang unang kargamento sa lana gikan sa Russia ngadto sa Pilipinas sulod sa lima ka tuig.
Sa miaging semana, ang CEO sa Petron nga si Ramon Ang miingon nga ang kompanya nakigsulti aron posible nga mopalit og lana gikan sa Russia, apan nagdumili siya sa pagkumpirma sa pag-abot sa kargamento.
Matud ni Presidente Ferdinand Marcos nga ang Pilipinas nangita og alternatibong tinubdan sa lana tungod kay ang kasamtangang suplay sa nasud gilauman nga molungtad lamang og 45 ka adlaw.
Samtang, giluagan sa Estados Unidos ang pipila ka mga restriksyon sa pagbaligya sa krudo sa Russia, nga nagtugot sa pagpalit sa lana nga anaa na sa pagbiyahe hangtod sa Abril 11.
