Dili lang ang sektor sa transportasyon ang angay hatagan sa gobyerno og P5,000 nga ayuda apan lakip na ang lima ka milyon nga minimum wage earners sa tibuok nasud tungod kay apektado usab sila sa krisis sa ekonomiya human sa pagsaka sa presyo sa lana sa merkado sa kalibutan, sumala sa Trade Union Congress of the Philippines o TUCP.
Mao kini ang gipamugos sa TUCP, nga girepresentahan ni Deputy Speaker Raymond Democrito Mendoza, sa House diin gusto nila nga mapalawig kini nga wage subsidy labi na kay ang P200 nga legislative wage hike bills wala pa mahisgutan sa Kongreso.
Sulod sa kapin tulo ka dekada, matod nila, ang mga regional wage boards wala magpakabana sa mga minimum wage earners ug sama sa ubang mga sektor, kinahanglan nila ang pinansyal nga tabang sama sa gihatag sa gobyerno sa lainlaing mga sektor gawas sa transportasyon.
Hangtod karon, matod niya, ang gobyerno, labi na ang Department of Labor and Employment (DOLE), padayon nga wala magpakabana niining mga trabahante ug wala pa gani sila giapil sa UPLIFT Committee sa Malacanang Palace.
Ang P5,000 nga subsidy sa sweldo, katumbas sa duha ka bulan nga P100 nga inadlaw nga pagtaas sa sweldo nga gipasar sa Senado sa ika-19 nga Kongreso, wala gisumite sa bicameral conference committee ug busa nahimong walay pulos.
Ang grupo ni Mendoza miingon nga P25 bilyon lang ang inisyal nga pondo nga gikinahanglan o 10 porsyento sa P230 bilyon nga kuno gamiton sa gobyerno isip pondo sa pagpatuman sa mga programa taliwala sa gideklarar nga State of National Energy Emergency.
