Singkwenta’y tres ka mga Pilipino nga giingong biktima sa human trafficking ug napugos sa pagtrabaho sa mga online scam operations sa Cambodia ang nibalik na sa Pilipinas, sumala sa Department of Migrant Workers (DMW).
Ang mga biktima miabot sa Ninoy Aquino International Airport Terminal 1 sayo sa Biyernes sa buntag sakay sa usa ka Philippine Airlines flight gikan sa Phnom Penh.
Sumala sa DMW, ang mga biktima gihaylo pinaagi sa messaging app nga Telegram diin gisaaran sila og mga trabaho ug sweldo gikan sa $600 hangtod $1,000 kada bulan uban sa giingong legal nga work visa.
Usa sa mga biktima miingon nga napugos sila sa pagpangita og 26 ka “love scam” nga kliyente kada adlaw. Kung dili nila kini mahimo, gisilotan kuno sila sama sa pagpahimo og gatusan ka push-up, dili pagpakaon, ug dili pagbayad.
Duha sa mga nibalik nanginahanglan dayon og medikal nga atensyon—usa tungod sa kidney failure ug ang usa tungod sa fractured clavicle human sa aksidente sa sakyanan. Dad-on sila sa mga ospital sa Department of Health alang sa dugang nga pagtambal.
Ang pagpauli gihimo uban sa tabang sa embahada sa Pilipinas sa Cambodia ug sa rapid response team sa DMW. Gisugat usab sila sa mga personahe gikan sa Overseas Workers Welfare Administration, Bureau of Immigration, ug NAIA Task Force Against Trafficking.
Ang mga biktima temporaryong magpabilin sa usa ka pasilidad samtang gikuha ang ilang mga pahayag. Hatagan usab sila og psychosocial counseling, reintegration assistance, ug transportasyon pabalik sa ilang mga probinsya.
Balik-balik nga gipasidan-an sa mga awtoridad ang mga nangita og trabaho batok sa mga laraw sa trafficking nga nalambigit sa mga online scam hub sa gawas sa nasud.
