MAGUINDANAO – Luwas nga na rescue ang usa ka 6-anyos nga batang lalaki human kini maanod sa usa ka sapa sa Datu Unsay, Maguindanao del Sur atol sa lihok-responde sa Bureau of Fire Protection (BFP) – BARMM.
Sa ulat, daling miresponde ang mga personahe sa Bureau of Fire Protection (BFP) – Datu Unsay ubos sa Oplan Iwas Paputok human mangayo og tabang ang mga residente sa dapit diin nahitabo ang insidente sa pagkalumos sa batang lalaki.
Mismo ang Chief Provincial Operations sa Office of the Provincial Fire Marshal, nga si SFO2 Mohammad E. Jumuad, ang nagpatuman og cardiopulmonary resuscitation (CPR) sa biktima sa dihang nakuhaa kini gikan sa tubig.
Tungod sa ilang dinaliang aksyon, naluwas ang bata ug dali usab kining gidala sa ospital aron mahatagan og tukmang medikal nga pag-atiman. Padayon nga gimonitor sa mga doktor ang kahimtang sa menor de edad.
Nagpasalamat usab ang komunidad sa paspas ug epektibong pagresponde sa BFP – Datu Unsay ug sa uban pang ahensya nga nagtinabangay sa pagluwas sa kinabuhi sa bata.
