Nasayran nalang wala nay kinabuhi ang usa ka langyaw sulod sa iyang kaugalingong lawak sa Quijano Compound sa Barangay Calamba dakbayan sa Sugbo karong Lunes sa buntag, Disyembre 29, 2025.
Sa inisyal nga impormasyon nga nakuha sa Bombo Radyo Cebu News Team, giilang ang langyaw nga si alyas “David” hingkud ang panuigon nga American national og dugay nang nagpuyo sa Pilipinas, partikular na diri sa dakbayan sa Sugbo.
Sumala pa sa nahinabi sa Bombo Radyo Cebu News Team kang Jefferson Saromines, nga nagpailang suod nga higala sa maong biktima kay layo kini sa iyang kaugalingong pamilya sa Estados Unidos ingon man nga nasuta pud nga aduna na kiniy mga kakulian sa panglawas dugang pa sa iyang kanunay nga pag-inom sa ilimnong makahubog.
Kasamtangang nagpadayon pa ang pagproseso sa patayng lawas sa biktima diin nagpaabot kini nga makigkoordinar sa pamilya aron sa pagpahapsay sa iyang ulahing pagpahuway.
