GENSAN- Angayang hatagan og kahigayunan si kanhi Department of Justice Secretary Jesus Crispin “Boying” Remulla paunsa niini dumalahan ang Office of the Ombudsman human nga gituboy ni Pres. Ferdinand Marcos Jr.
Matud ni Atty. Rogelio Garcia, gilauman na niya nga si Remulla ang pilion sa pangulo alang maong posisyon nga adunay fixed term nga pito ka tuig.
Si Remulla ang hulip kang Hon. Samuel R. Martires nga natapos na ang termino kaniadtong Hulyo, 2025.
Gibutyag ni Atty.Garcia nga importante nga kaalyado sa Pangulo ang maglingkod nga Ombudsman apan pagtan-aw sa pipila nga himuon lamang nga ‘berdugo’ o ‘itoy’ ni PBBM si Remulla.
Dugang pa ni Atty. Garcia nga daghan usab ang wala nalipay sa appointment ni Remulla ilabina gikan sa kampo sa mga Duterte tungod sa daghang kaso ang natanggong sa Ombudsman nga gipaabot nga maablihan sa pagkatuboy sa kanhi DOJ Secretary.
Hinuon, gibutyag ni Atty. Garcia nga competent si Remulla sa bag-ong posisyon og galaum nga himuon niini ang iyang trabaho nga adunay integridad og kredibilidad.
