Nasubo ang netizens sa gitahong namatay na ang iro nga si “Tiktok” human kining naligsan ug sakyanan niadtong Setyembre 7, Domingo sa syudad sa Bacolod.
Kaniadtong Pebrero, natandog ang mga netizens sa nahisgutang iro human nag-viral sa social media ang iyang litrato nga napuno ug pinanaan ang iyang lawas sa lungsod sa Murcia.
Sa milabayng adlaw ang Bacolod Animal Chance & Hope (BACH) Project PH, usa ka animal rescue group nga nag-atiman kay Tiktok, mipasabot nga si Tiktok temporaryong giatiman sa usa ka volunteer tungod sa pagkaylap sa distemper sa mga iro sa animal shelter.
Giingong wala makabantay ang volunteer nga nigawas na sa balay si Tiktok ug nidagan paingon sa karsada diin nadasmagan sa sakyanan ug namatay.
Samtang kaniadtong Lunes, Setyembre 8, 2025, adunay public viewing nga gipahigayon alang kay Tiktok sa wala pa gihimo ang cremation.
Kahinumduman nga kaniadtobg Pebrero, giluwas sa BACH Project PH si Tiktok human kini nakaangkon ug lima ka samad sa nagkadaiyang parte sa lawas sa Barangay Blumentritt sa lungsod sa Murcia sa Negros Occidental.
Human naluwas ug naayo sa iyang mga samad, nakaapil pa si Tiktok sa usa ka fun run kaniadtong Agosto uban sa ubang mga animal cruelty survivors.
