Gikondena sa pipila ka netizens si Vice Ganda human nagpadungog-dungog kang kanhi Presidente Rodrigo Duterte sa unang gabii sa iyang concert.
Sa usa ka parody, daw gipadunggan ni Vice ang kontrobersyal nga “Jet Ski promise” ni Duterte, gihisgutan niini ang mga DDS (Diehard Duterte Supporters), ug nagtapos sa usa ka impersonation sa kanhi Presidente nga nakapatawa sa mga nanan-aw.
Apan, dili tanan nalipay niini, rason nga usa ka Facebook user nga giilang Davaoeño ang nanawagan sa City Government of Davao nga ideklarang persona non grata ang komedyante.
Ang persona non grata usa ka Latin nga termino nga nagpasabot nga ang usa ka tawo dili na welcome, kasagaran tungod sa mga binuhatan nga giisip makadaot o dili pagtahod sa komunidad.
Namatikdan usab nga mikunhod ang followers sa maong komedyante nga gikan sa 20 milyon, niubos og 19 milyon, ug padayon pang nagaubos.
Pipila usab ka mga Dabawenyo ang uyon sa panawagan ug nag-ingon nga “deserve” matud pa ni Vice Ganda ang persona non grata.
Matud sab sa pipila ka mga Dabawenyo nga walay kaso ang magyaga-yaga, apan dili lang unta magpalabi ug mag-joke nga below the belt, dugang sa usa pa ka Dabawenyo.
Isip usa ka public figure, angay matud pa nga magmatngon sa mga ginasulti ug mga aktibidad gumikan dako kini og epekto sa career ug katilingban.
Sa pikas bahin, gidepensahan ni Rep. Perci Cendaña ang gibuhat sa komedyante ug nagpasalamat sa nahimong baruganan ni Vice Ganda.
