Dul-an sa unom ka bulan human namatay ang Taiwanese actress nga si Barbie Hsu sa edad nga 48 tungod sa influenza-related pneumonia samtang nagbakasyon sa Japan, nagsubo gihapon ang iyang bana nga si DJ Koo (Koo Jun-yup).
Sumala sa mga taho, kanunay nga gibisita ni DJ Koo ang lubong ni Barbie sa Chin Pao San Cemetery sa New Taipei, Taiwan, rain o shine.
Gikumpirma sa usa ka netizen ang taho kaniadtong Hulyo 27, pagkahuman naghatod ang usa ka fan ni Hsu ug bulak sa lubnganan niini.
Sa ilang pag-abot, ilang nakit-an si DJ Koo nga hilom nga naglingkod sa usa ka foldable chair, nagsul-ob og itom nga tank top ug cap, ug nag-antos sa kainit sa adlaw samtang nagtan-aw sa lubnganan sa iyang namatay nga asawa.
Sumala sa taho sa ETtoday, nakita usab si DJ Koo nga nagtan-aw sa mga residential properties duol sa sementeryo duha ka bulan ang milabay, partikular ang bag-ong gitukod nga Four Seasons Garden.
Ang developer nagdumili sa pagkomento, samtang ang inahan ni Hsu miingon nga wala siya nahibal-an sa plano.
Si Barbie ug DJ Koo unang nagkita niadtong 1998 ug kadiyot nahimong managhigugmaay.
Nagkrus na usab ang ilang mga dalan ug nagpakasal sila kaniadtong 2022 human sa 23 ka tuig.
