Nisaka ngadto sa unom ang ihap sa namatay sa Bagyong Crising ug Habagat tungod sa pagbaha tungod sa kusog nga ulan.
Base sa report gikan sa National Disaster Risk Reduction and Management Council (NDRRMC), tulo ka mga patay ang natala gikan sa Northern Mindanao ug matag usa gikan sa MIMAROPA, Davao Region ug Caraga.
Hinuon, hangtod karon, duha pa lang sa unom nga gikataho nga namatay sa bagyo ug Habagat ang kompirmado.
Ang giila nga biktima gikan sa Barangay Población sa Mambajao, Camiguin kinsa naigo sa natumba nga kahoy niadtong Hulyo 19.
Gidali kini sa pagdala sa tambalanan apan gideklara nga patay na tungod sa ‘trauma secondary to external injury’.
Ang laing biktima gikan sa Barangay Matin-ao sa Mainit, Surigao del Norte, kinsa sakay sa motorsiklo gikan sa balay sa iyang higala dihang nadasmagan sa natumba nga kahoy.
Sumala sa ahensya, lima usab ang gikataho nga naangol samtang unom ang gikataho nga missing.
Sa pagkakaron, kapin sa 1.2 million ka indibidwal o kapin sa 300,000 ka pamilya ang naapektuhan sa pagkusokuso sa Bagyong Crising, ang southwest monsoon ug low-pressure area (LPA) sa tanang rehiyon sa nasod gawas sa Eastern Visayas.
Diin natala ang baha, pagdahili sa yuta, nahugno nga mga estraktura ug mga buhawi sa mga apektadong lugar.
