Gisiguro sa House of Representatives nga sila mutugon sa hangyo sa Korte Suprema may kalabot sa petisyon sa impeachment batok kang Vice President Sara Duterte.
Matod kang House of Representatives Spokesperson Atty. Princess Abante nga magsumite sila og dugang nga ‘sworn information’ nga may kalabutan sa impeachment batok kang VP Sara.
Ang maong pamahayag ni Abante misunod human madawat sa Kamara ang kopya sa desisyon sa Supreme Court kaniadtong Hulyo 8, nga nangayo og mga dokumento kalabot sa impeachment.
Kini may kalabutan sa gisumite nga petisyon sa kampo ni Duterte nga nagahagit sa ‘constitutionality’ ug kasamtangang proseso sa impeachment proceedings sa Senado.
Dugang pa ni Abante nga ang maong isyu ilang girefer na sa Office of the Solicitor General (OSG), nga maoy magrepresentar sa House of Representatives sa maong kaso.
Gisiguro usab ni Abante nga makigkoordinar sila sa OSG aron masiguro nga masumite ang gipangayo nga mga dokumento.
Sa gi-isyu nga resolusyon sa Supreme Court, gimanduan niini ang Kamara ug Senado nga magsumite sa mga dokumento.
Gipa-impeach sa House of Representatives si VP Sara tungod sa daghang basehan, lakip na niini ang sayop nga paggamit sa P125 million nga confidential funds nga gigasto sulod lang sa 11 ka adlaw kaniadtong Disyembre 2022.
