Posibleng mahimong bagyo ang low pressure area (LPA) ibabaw sa Philippine Sea sulod sa mosunod nga 24 oras.
Kung kini mahimong bagyo, tawgon kini nga “Bising”.
Samtang ang LPA nagkaduol sa yuta, posible nga ang mga lugar sa sidlakang bahin sa Northern ug Central Luzon ipataas sa Tropical Cyclone Wind Signal #1, sumala sa state weather bureau.
Katapusang namonitor ang nag-develop nga weather system alas 8:00 kaganinang buntag sa gilay-on nga 230 kilometro sidlakan sa Tuguegarao City, Cagayan.
Mahimong hinay ang paglihok niini ug magpabilin sa sidlakang bahin sa Northern Luzon karong adlawa base sa forecast sa weather bureau.
Ang LPA gilauman usab nga magdala sa kasarangan ngadto sa kusog nga pag-ulan sa mga bahin sa Northern Luzon hangtod sa Biyernes, Hulyo 4.
Samtang, padayon nga ginabantayan ang tropical depression sa gawas sa Philippine Area of Responsibility (PAR).
Ang bagyo nahimutang 2,680 km sidlakan-amihanan-sidlakang bahin sa sa Extreme Northern Luzon sugod alas 8:00 sa buntag karong adlawa.
Ang habagat gipaabot nga magdala ug katag-katag nga pag-ulan sa ubang bahin sa Luzon, lakip ang Metro Manila ug Western Visayas.
Gitambagan ang publiko nga magmatngon sa hulga sa pagbaha ug pagdahili sa yuta sa ubos ug kabukiran taliwala sa gipaabot nga pag-ulan.
