Gi- pawalay bili sa Korte ang pagka-mayor ni Alice Guo sa Bamban, Tarlac human nipagawas og desisyon si Judge Liwliwa S. Hidalgo niadtong Hunyo 27, 2025.
Gitugotan sa Manila Regional Trial Court (RTC) Branch 34 ang quo warranto petition sa buhatan sa solicitor general batok kang Guo tungod kay sa walay duhaduha Chinese siya kay Chinese ang iyang amahan ug inahan.
Buot ipasabot nga ‘void’ o invalid ang pagka mayor ni Guo sukad pa sa sinugdanan. Gipamatud-an usab sa Korte nga si Alice Guo ug ang Chinese citizen nga si Guo Hua Ping managsama nga tawo base sa susamang fingerprints. Gipanghimakak sa legal team ni Guo ang imbestigasyon nga gihimo sa National Bureau of Investigation ug ang akusasyon nga si Guo natawo sa Chinese nga mga ginikanan.
Gihatagan usab og gibug-aton sa korte nga ang pasaporte sa Pilipinas ni Guo ug ang iyang birth certificate dili igo nga ebidensya sa pagmatuod sa iyang pagka-Filipino citizen.
Ang desisyon nag-ingon usab nga dili ikalimod nga si Guo ug ang iyang mga ginikanan Chinese ug niabot sa Pilipinas gikan sa Fujian, China, niadtong Hulyo 12, 1999.
Ang desisyon sa korte nagkanayon nga dili lang siya ma-disqualify sa posisyon sa pagka mayor, apan dili usab siya makadagan niini.
Dugang pa sa korte nga wala mausab ang iyang pagka-disqualify bisan og napili siya ug pormal nga nanumpa sa katungdanan.
Nalatid usab sa desisyon nga dili balido ang iyang proklamasyon gikan sa pag-file niya sa iyang Certificate of Candidacy. Kahinumdoman nga niadtong Agosto 2024, ang Office of the Ombudsman nimando sa iyang pagpalagpot tungod sa iyang kalambigitan sa Philippine Offshore Gaming Operators (POGO).
