Nakabalik na sa Pilipinas ang unom ka repatriated overseas Filipino workers gikan sa nasud Iran.
Ang nasangpit nga gidaghanon sa mga mamumuong Pilipino naapektuhan sa kagubot sa Middle East, partikular sa gubat tali sa Israel ug Iran.
Matod sa Department of Migrant Workers, lima niini nagtrabaho isip shrimp hatchery technicians sa Iran samtang ang usa ka domestic worker gikan sa Dubai.
Nanguna si Overseas Workers Welfare Administration (OWWA) Administrator Patricia Yvonne Caunan sa pag-abiabi kanila sa Ninoy Aquino International Airport (NAIA) Terminal 3.
Kauban ni Caunan sila si Department of Foreign Affairs Undersecretary Eduardo de Vega ug DMW Assistant Secretary Venecio Legaspi.
Sa ilang pag-abot, gihatagan sila og financial assistance sa DMW, OWWA, ug DSWD.
Kining maong lakang sa ahensya subay sa direktiba ni Presidente Ferdinand Marcos Jr. nga pagseguro nga luwas nga makauli sa Pilipinas ang tanang OFW sa Middle East.
