Gipapha sa Department of Foreign Affairs (DFA) ang publiko batok sa mga kabalaka nga posibleng magamit ang Enhanced Defense Cooperation Agreement (EDCA) sites sa Pilipinas alang sa mga giyera sa Middle East tungod sa kalambigitan sa Estados Unidos sa maong rehiyon.
Matud sa DFA, klaro ang kasabutan tali sa Pilipinas ug Estados Unidos nga ang paggamit sa mga EDCA site kutob lamang sa mga makataong katuyoan, disaster response, ug pagpalig-on sa depensa sa nasud.
Giinsistir sa DFA nga walay basehan ang mga suspetsa nga magamit ang mga pasilidad sa bisan unsang military operation sa US batok sa mga nasud sa Middle East.
Dugang pa sa DFA, adunay mekanismo ilawom sa kasabutan nga nagkinahanglan og pagtugot gikan sa gobyerno sa Pilipinas sa bisan unsang kalihukan sa sulod sa mga EDCA sites.
Gihangyo usab sa DFA ang publiko nga magpabiling kalmado ug dili dali motuo sa mga impormasyon nga walay lig-on nga basihan, ilabi na karon nga nagkataas ang tensyon sa Middle East.
