Gihatagan ni National Police Commission (NAPOLCOM) Executive Director Rafael Vicente Calinisan ug grado nga 9.9 si Philippine National Police (PNP) Chief, PGen. Nicolas Torre III.
Kini alang sa hapit usa ka buwan nga pamunoan sa heneral sukad siya gitudlo nga hepe sa nasudnong kapolisan niadtong Mayo 29, 2025.
Gipasabot ni Calinisan nga ang halos hingpit nga grado sa PNP Chief tungod sa mga inisyatiba nga iyang gihimo alang sa kapolisan ug sa publiko nga nagpakita nga gibati niya ang gikinahanglan sa publiko nga matud pa niya matubag sa iyang liderato isip hepe sa kapolisan
Gitataw sa kadagkoan sa Napolcom nga ang gikinahanglan sa nasudnong kapolisan mao ang action man nga makahimo sa iyang trabaho ug katungdanan, butang nga matod niya nga mapakita ug mahimo sa PNP Chief.
Ang nahabilin nga usa ka punto, matod niya, mahimong magsilbi nga inspirasyon ni Torre sa pagtuman sa iyang mga katungdanan.
Giklaro sa opisyal nga ang grado nga 9.9 dili tungod kay kuwang pa sa iyang katungdanan ang hepe sa nasudnong kapolisan apan kinahanglan usab nga aduna siyay inspirasyon sa pagbuhat sa iyang trabaho.
Si Torre ang unang graduate sa Philippine National Police Academy nga nahimong PNP Chief, nga nagtapos sa pipila ka dekada nga paghupot sa pinakataas nga posisyon sa PNP sa mga gradwado sa Philippine Military Academy.
