Gipadayag sa pipila ka senador-huwes sa impeachment trial ni Bise Presidente Sara Duterte ang tinguha nga madungog gihapon ang presentasyon sa depensa kalabot sa tulo ka articles of impeachment nga gibawi sa prosecution panel.
Kini human giatras sa mga piskal ang Articles I, III ug IV nga naglangkob sa mga alegasyon sa sayop nga paggamit sa confidential funds, bribery ug grabeng hulga, hinungdan nga Article II na lamang, kalabot sa giingong dili mapatin-aw nga bahandi, ang nahibiling hisgotan sa impeachment court.
Lakip sa nagpahayag sa iyang kabalaka si Senator-Judge Joel Villanueva, nga miingon nga ang Bise Presidente angay gihapong hatagan og higayon nga motubag ug makadepensa sa iyang kaugalingon batok sa mga alegasyon.
Matod ni Villanueva, mosupak unta siya sa mosyon sa prosecution panel nga bawion ang tulo ka articles of impeachment kon nakaabot siya sa oras sa pag-abri sa impeachment court niadtong Oktubre 13.
Dugang pa niya, tungod kay gipasalida sa publiko ang proseso ug usa ka politikanhong personalidad ang gidepensahan, angay nga hatagan og igong panahon ang depensa aron ipasabot ug ipagtalipod ang ilang baruganan.
