Nihimo saiyahang unang courtesy visit sa Commission on Human Rights (CHR) ang hepe sa Philippine National Police (PNP) nga si PGen. Nicolas Torre III kagahapong adlawa , hinungdan nga siya ang unang hepe sa National Police nga mibisita sa buhatan.
Ang pagbisita sa hepe sa komisyon gitumong aron maklaro ang iyang mga direktiba kalabot sa gidaghanon sa mga dinakpan sa han-ay sa mga polis nga basehanan sa ilang performance ug aron makakuha og promosyon.
Subling gipasabot ni Torre nga ang trabaho sa kapulisan mao ang pagdakop sa mga kriminal ug pagpatunhay sa kalinaw sa kadalanan sa nasod ilabi na sa mga komunidad.
Busa dakong kalamboan ang pagbisita sa PNP sa komisyon aron ipakita nga sila nagkahiusa sa pagpanalipod sa tawhanong katungod sa katawhang Pilipino.
Ang hepe nipadayag sa iyang dakong pasalamat ngadto sa komisyon tungod sa kanunay nga pagsusi sa ilang organisasyon ug pagka-partner nila sa pagsiguro nga ang tanan nilang buhaton nahisubay ug dili supak sa balaod, ilabi na sa tawhanong katungod.
Samtang, ang CHR miila sa mga inisyatiba ni Torre ug misaad nga mosuporta ug mokooperar sa pagpatuman sa warrantless arrest.
Si CHR Chairperson Atty. Richard Palpal-latoc niingon nga suportado nila ang papel sa kapulisan sa pagmintinar sa seguridad sa mga komunidad ug pagsiguro sa kaluwasan sa mga lungsuranon niini.
Dugang pa sa opisyal nga basta walay malapas nga balaod ang kapolisan sa pagtuman sa ilang mandato, padayon silang mosuporta sa direktiba ni Torre.
Matod niya nga mahimo usab nga mogamit og puwersa ang kapolisan ilabi na kon kini gikinahanglan ug kon adunay hulga sa ilang kinabuhi.
Sa laing bahin, mas nipasalig karon ang komisyon tungod kay ang pagbisita ni Torre sa ilang buhatan makaseguro nga makaseguro ang publiko nga padayong ipatuman sa PNP ang balaod sa umaabot nilang mga operasyon.
Matod pa niya nga importante ang panagtagbo ug diskusyon niining duha ka institusyon tungod kay mas mopalig-on ug molambo pa ang ilang relasyon aron maapil sa mandato sa kapolisan ang pagkonsiderar sa tawhanong katungod.
