Gipahimangnoan sa Bureau of Immigration (BI) ang publiko batok sa mga peke nga dokumento, sama sa mga suwat nga nagpakaaron-ingnon gikan sa ahensya ug pagpangayo og kuwarta sa ilang mga nakadawat.
Matod ni BI Commissioner Joel Anthony Viado, ang mga mangingilad naggamit niining mga matang sa mga sulat aron sa paghadlok ug pagdali sa biktima nga magpadala ug kuwarta.
Usa sa mga kaso nga ilang nadawat mao ang peke nga suwat nga giingong gipirmahan ni Viado ug gipadala sa usa ka babaye sa Pampanga.
Matod ni Viado, kabahin kini sa gitawag nga “love scam” diin gipatuo ang biktima nga gi-block sa airport ang ilang langyaw nga kauban nga ilang nahimamat online.
Naa sad sa sulat ang pahimangno nga hunongon ang kontak sa langyaw, uban ang mga hulga nga may kalabotan sa Anti-Money Laundering Act.
Ang nasangpit nga sulat nagmando sa biktima sa pagkontak sa usa ka “opisyal” pinaagi sa social media ug mobile number, ug naghatag ug instruksiyon sa pagpadala ug kuwarta sa pribadong bank account—nga dili awtorisado sa BI.
Giawhag ang publiko nga dili mutuo sa maong matang sa scam.
