BACOLOD CITY– Duha ang patay ug daghan ang angol human sa pagpamusil nga nahitabo sa Sityo Ipil-Ipil, Barangay Mambulac, Silay City, Negros Occidental kaganinang buntag.
Sa interview nga nakuha sa Bombo News Team, ang mga biktima mga boluntaryo sa Team Ugyon nga nagbarog sa gawas sa usa ka balay nga gikonsiderar nga headquarters sa Team Asenso sa dihang milabay ang van ug namusil.
Duha ang kompirmadong patay samtang lima ang naangol ug daling gidala sa pinakaduol nga tambalanan.
Matod sa mga saksi, ang mga volunteer sa Team Ugyon giingong nag-monitor sa headquarters sa Team Asenso kagabii tungod sa ilang gituohang vote buying.
Gikompirma ni Police Col. Rainiero de Chavez, provincial director sa Negros Occidental Police Provincial Office nga ginakonsidera nga suspek si Barangay Captain Arnie Benedicto sa Barangay Lantad, Silay City, kinsa kasamtangang at-large.
Sa gipagawas nga pamahayag ni Atty. Jose Edward “Chickoy” Davila, legal counsel ni Mayoralty candidate Mark Golez, ang Team Asenso Silay mikondena sa pagpatay ug nagpaabot sa pahasubo sa pamilya.
Nanawagan usab kini alang sa malinawon, matinud-anon ug hapsay nga eleksyon.
Sa laing bahin, nanawagan si Mayor Joedith Gallego sa mga supporters sa duha ka grupo nga mokalma tungod kay lumalabay lang ang eleksiyon, busa di sila angay magpadala sa emosyon ug morespeto sa bisan unsa nga resulta.
